2017/10/23

Nola instalatu Popcorn Time Ubuntu eta deribatuetan



Popcorn Time filmak eta serieak online ikusteko aplikazioa da eta euskaraz dago. Honela instala daiteke 0.3.10 bertsioa Ubuntu eta deribatuetan:

1. Deskargatuko dugu aplikazioaren paketea hemendik.
2. Deskarga egin dugun karpetara joan, eskuin klik egin eta Ireki terminalean egingo dugu eta bertan agindu hau itsatsiko dugu:

tar -xf Popcorn-Time-0.3.10-Linux-64.tar.xz -C /opt/popcorn-time/

3. Orain /usr/bin karpetan esteka bat sortuko dugu Popcorn Time terminaletik exekutatu ahal izateko:

sudo ln -sf /opt/popcorn-time/Popcorn-Time /usr/bin/popcorn-time

4. Orain aplikazioaren Internet ataleko abiarazlea sortuko dugu:
sudo gedit /usr/share/applications/popcorntime.desktop

Irekiko da fitxategi huts bat eta bertan testu hau kopiatuko dugu:

[Desktop Entry]
Version = 1.0
Type = Application
Terminal = false
Name = Popcorn Time
Exec = /usr/bin/popcorn-time
Icon = /opt/popcorn-time/src/app/images/icon.png
Categories = Application;Network

 5. Bukatzeko behar den libgconf-4-4 liburutegia instalatuko dugu:

sudo apt-get install libgconf-2-4

6. Martxan jarri Aplikazioak > Internet ataletik eta euskaraz jartzeko eskuin aldeko ezarpenetan klikatu (gurpil horzduna) eta user-interfaze ataleko Language-ean Euskara hautatu.

Kontuan izan filma hautatuta aukera dugula 720 edo 1080 pixeletan (segun zer nolako konexio abiadura dugun) eta Popcorn-en Butter erreproduzigailuaren bidez edo VLCren bidez. Nik uste dut VLC bidez geldiketak egoteko aukera gutxiago dagoela eta azpitituluen fitxategia badugu (azpitituluak.com-etik euskarazko azpititulua deskargatuta kasu) VLCri adierazten ahal diogu non dugun fitxategia.

2017/10/18

Nola erabili daiteke mikroskopio digitala Linux sistemetan

Badira salgai hainbat mikroskopio edo lupa digital x60 eta x1000 bider handitzen dutenak eta 8 ledeko argia eta USB konexioa dutenak. Ez dut markarik eta saltzailerik aipatuko baina 18-30€ artean ibiltzen da bere prezioa -euskarriaren arabera, gehien bat-.


Mikroskopio hauek oso interesgarriak dira ikasgelarako oihalen egitura, intsektuak, orbela, ilea, ur-putzuen fauna...  Web-kamera dute, beraz ez da lagina xaflatu behar, mikroskopioa urbildu fokatze distantzia doitu arte eta gozatu.

USB bidez konektatzen da ordenagailura eta bertatik hartzen du elikadura elektrikoa. Portatil txiki bati lotuta mendian erabiltzen ahal da ederki asko.

Mikroskopio hauek Microsoft-erako kontrolatzaileak eta aplikazioa ekartzen dute baina Linux-en erabiltzen ahal dira web-kamera duten neurrian -nik Ubuntun probatu dut-.

Irakurri dut web-kamerak erabiltzeko Cheese edo Guvcview aplikazioekin saiatu naiz -interneten horiek gomendatzen dira- baina ez dute kamera ezagutu. Bai, ordea, OBS-Studio grabazio eta transmisiorako aplikazioa -informazio gehigarria mezu honetan eta instalazioa web honetan-.

Bideo batez deskribatu dut  nola prestatu eszena bat web-kameran oinarrituta eta nola ikusi ordenagailuan pantaila osoan:



Zure ordenagailua portatila bada web-kamera propioa edukiko du eta bideoak deskribatutako prozesuan ekipoarena baztertu eta mikroskopioaren web-kamera hautatu beharko duzu.

Behin OBS-en ezarrita dugula mikroskopioa egiten ahal dugu pantaila argazki arruntak Imp Pant teklaren bidez edo edizio elementuak HotShot-en bidez. Argazki segidak eginez gero stop motion moduko bideoa egin dezakegu OpenShot-en bidez.

Neurketak egiteko Screen Ruler erabili dezakegu, beti ere proportzioak kalkulatuta.

Ikasleek -edo seme-alabek- gauzen eta bizidunen izaera aztertzea bultzatu nahi baduzu gailu oso interesgarriak dira.

Hona hemen Berritzegune Nagusiak mikroskopio-lupa digitala LH-en eta DBH-en erabiltzeko prestatutako hainbat jarduera interesgarri:

https://drive.google.com/file/d/0B_XmsySV0YC6eXFUMzFHbmhGU0E/view?usp=sharing

2017/10/12

Nola jakinarazi zure kokapena Telegram bidez

Telegram mezularitza aplikazioak 4.4 ekarri duen berritasunen interesgarri bat kontaktu bati edo talde oso bati kokapena jakinaraztea da .
Ikus dezagun nola egin daitekeen:


1. Telefonoan kokapena gaitu.

2. Telegram ireki, aukeratu kontaktua edo taldea eta mezuaren tiran eranskinaren ikonoa (klipa) sakatu.


3. Agertzen diren aukeren artean kokapena sakatu.


4. Pantailan uneko kokapena agertzen da eta bi aukera: uneko kokapena bidali edo hainbat denboraz kokapena jakinarazi.

Ezkerrean kokapena eta aukerak. Eskuinean kokapena zenbat denboraz partekatzeko aukera.


Unekoa interesgarria da kontaktuak edo taldeak jakiteko momentu honetan non zauden eta bigarrena erabili daiteke mendira joatean, bizikletaz...

2017/10/10

Keme kontabilitate aplikazio irekia bizirik

Bost urte dira Ekonomia irakasle batek institutuan ikasleekin kontabilitatea lantzeko Linuxerako aplikazio bat eskatu zidala -Windowseko Contaplus-en tankerakoa- eta, bilatu ondoren, Keme aplikazioa instalatu nuela eta, aplikazioa euskaraz ez badago ere, Espainiako 2007ko Kontabilitate Plan Orokorra prestatu nuela Kemen ibiltzeko (hemendik deskarga daiteke plana, besteak beste Keme-rako pln formatuan).


Gustura erabili zuen baina irakasle hori joan zen eta kontabilitatea ordenagailuetan lantzen utzi zioten.

Bost urte pasata, poztu naiz irakurtzen aplikazioa bizirik dagoela -azken bertsioa 2017/7/18koa da- eta artikuluak idatzi duenaren iritsiz enpresa txiki-ertainentzat eta hezkuntzarako aplikazioetan hoberenetakoa dela.

Hona hemen Keme aplikazioaren ezaugarri nabarmenenak zerrendatzen dituen artikulua.

Aplikazioa Linux, Mac eta Windows bertsioak ditu. Github biltegitik deskarga daiteke Linuxerako deb instalazioa. Deskargatu eta bi klik eginez software zentroak instalatuko du.

Proiektuaren web orria.

2017/10/08

Nola ikusi zure Zim koadernoa Android-en

Oharrak hartzeko Zim wiki aplikazioaren erabiltzailea bazara (bestela begiratu mezu hau) eta zure koadernoa ikusi nahi baduzu -ez editatu- Android telefono edo tabletan begira nola egin daitekeen.

Abiapuntua da fitxategi sinkronizatzaile bat instalatzea ordenagailuan eta Androidean, hala nola Nextcloud, eta kontu bat izan hornitzaile batekin.
Koadernoa sinkronizatutako karpetan izatea komeni da, hartara koadernoa sinkronizatuta ikusiko dugu baina formaturik gabeko txt-ean.

Web formatuarekin ikusi nahi baduzu koadernoa html formatura esportatu behar duzu:
Fitxategia > Esportatu > Koaderno osoa > Esportatu orri guztiak fitxategi bakar batean eta arakatu -Browse-  sinkronizatutako karpeta eta izena jarri Zim.html > Ados

Zim.html fitxategia ikusteko Android-aren fitxategi arakatzailea erabiltzen ahal duzu -Nextclouden arakatzailearekin ez dabil-.

Hurrengo pausua izango da html formatuko fitxategi horri laster-marka bat egitea telefono edo tabletaren mahaigainean. Horretarako instala dezakezu besteak beste fitxategien laster markak egiteko aplikazio bat: Shortcut Customizer Dezit. Abiatu eta aukeren artean Zim.html fitxategiaren laster-marka egiteko aukeratuko duzu Other.


Fitxategia aukeratzeko desplazatuko korrituko duzu atzamarra eskuinerantz menua agertzeko eta bertan Internal storage -Barneko biltegia- aukeratu.


Eta bertan sinkronizatutako karpetan aukeratu Zim.html fitxategia.


Eta Zim.html laster-marka mahaigainean agertuko da.


Bertan klikatuta fitxategia ikusteko hautatu Html ikustailea. Pantailan agertuko zaizkizu ezker aldean eta kolore urdinez koadernoaren orriak eta edozein orritan klikatuta orri horren edukia ikusiko duzu html formatu ederrean.



Bi ohar:
  • Nahiz eta koadernoa sinkronizatuta izan Zim.html fitxategia eguneratzeko esportatu behar dugu berriro.
  • Laster marka egiteko erabilitatako Shortcut Customizer aplikazioa desinstalatzen ahal dugu behin laster marka egina berriro erabili behar ez badugu.

2017/10/05

Peek: orain errazagoa da leihoaren tamaina egokitzea

Peek pantailan oinarritutako GIF animatuak egiteko aplikazioak (ikusi horri buruzko aurreko mezua) bere 1.1 bertsioa kaleratu du eta hobekuntza nabarmena dakar: orain errazagoa da grabazio pantailaren tamaina zehaztea. Horretarako ataza barran eskuin klik egin eta Aldatu tamaina egiten dugunean ezkerreko goi ertzetik tira eta ekarri aukera dugu zabalera eta altuera kontrolatzeko.

Peek bidez egina, jakina